ROXAS CITY – Nagapabilin nga wala pa matumod sang mga kapulisan ang mga suspetsado nga sakay sa nagaduag pula nga Toyota Innova nga nagluthang-patay kay Barangay Kagawad Oneal “Dodoy” Arandez sa isa ka talyer sa Barangay Cagay, Roxas City.
Suno kay Police Master Sergeant Ramil Arcangeles nga si Arandez gid lamang ang tuyo nga pagapatyon sang mga suspek bangud wala man sang may nadalahig nga iban nga tawo sa talyer.
Posible nga na-monitor sang mga suspek kun sa diin masami nagapadulong si Arandez rason nga natigayon nila ini maluthang patay kahapon nga adlaw.
Sa karon, ginahulat na lamang sang mga kapulisan ang resulta sang post mortem kag autopsy examination sa bangkay sang nasambit nga kagawad.
Padayon naman ang pagpangusisa sang mga kapulisan agud matumod ang mga suspek nga nagpatay kay Arandez.
Samtang, sa pagpangusisa sang Bombo Radyo News Team kay Kelvin Tan, nakita sini ang pagpanaog sang apat ka mga kalalakinhan sa salakyan apang wala niya ini mahitsuraan bangud lunsay nakasuksok ini sang bonnet sa ila nga ulo.
Suno kay Tan nga isa sa mga suspek ang nagpalupok sang armas luthang sa iya atubangan nga iya ginkakugmat rason nga nagtinguha man ini nga makapanago.
Indi naman mapat-od sang isa ka residente sa lugar kun pila ka lupok ang iya nabatian antes sini gintsekyar ang nagakahinabo sa guha.
Ginpahayag sang isa ka mister nga wala ini naglaom nga may ginpaulanan na sang luthang sa talyer bangud sa pagdumdom sini may nagapinalupok lamang sang trianggulo ukon labintador kag nakit-an na lamang sini nga ginpalapitan sang mga suspek si Arandez antes ginluthang.
Matandaan nga una na naaresto si Arandez sa ginkasa nga drug buybust operation sang Philippine Drug Enforcement Agency (PDEA).
Ginakabig naman nga High Value Target si Arandez bangud isa ini ka public official kag na-identify nga nagaduso sang ilegal nga droga kag kalakip man sa Directorate for Intelligence (DI) list sang pulisya.
