ROXAS CITY -Ginkompimar sang mga tag-iya sang motorsiklo nga ila ginapanag-iyahan ang pila ka mga motorsiklo nga narekober sang mga kapulisan gikan sa 24-anyos nga
kawatan nga nadakpan sa entrapment operation sa banwa sang Pontevedra.
Gin-ako kag ginpangtudlo sang suspek nga si Alexander Martinez ang mga ginpangbaligyaan sang ginpangkawat sini nga mga motorsiklo.
Una nga narekober ang Smash 115 nga motorsiklo gikan sa empleyado sang isa ka mall sa Roxas Avenue, Roxas City.
Ginpahayag ni Ram-ram Tupaz sang Barangay Lawaan sining siyudad nga ginkakibot sini nga ginpadulongan sang mga kapulisan kag ginpahayag nga kinawatan ang ginbakal sini nga motorsiklo.
Suno kay Tupaz nga ginbakal sini ang motorsiklo sa persona nga nagpakilala kay Jett Cyril Vidal kag nagkasugot nga bayaran ang motorsiklo sang P2,500 kada bulan sa sulod sang isa ka tuig apang gin-athag wala sang ihibalo nga kinawatan ang nasambit nga motorsiklo.
Samtang matapos nga nakabaton sang impormasyon gikan sa mga kapulisan nga may narekober nga motorsiklo, gilayon nga nagpadulong sa Roxas City Police Station si Mr. Jett Cyril Vidal sa diin ginkompirmar sini nga siya ang tag-iya sang motorsiklo nga ginbakal ni Tupaz.
Ginpahayag ni Vidal nga sang tinalikdan nga bulan sang Pebrero ginkawat ang motorsiklo nga naka-park sa parking space sa isa ka dako nga mall sa San Roque Street sining siyudad.
Ginkompirmar man ni Vidal nga nabilin sa sulod sang U-box sang motorsiklo ang mga dokumento nga ginpagamit sa pagbaligya ni Martinez.
Ginkompirmar man sang duha ka mga indibidwal nga sila ang tag-iya sang duha ka motorsiklo nga narekober sa 24-anyos nga kawatan nga nadakpan sa entrapment operation sa banwa sang Pontevedra.
Nagpadulong sa Roxas City Police Station si Reymus Briones sang Barangay Anhawon Panay Capiz matapos nga gin-impormar sang mga kapulisan nga may yara sang narekober nga motorsiklo.
Ginkompirmar ni Briones nga siya ang tag-iya sang Raider 150 nga narekober sa balay ni Martinez.
Suno kay Briones nga nadula ang nasambit nga motorsiklo sa parking space sa ginatrabahuan sini nga establisemento sa Barangay Lawaan sining siyudad.
Gindugang pa ni Briones nga nalipatan sini nga e-lock ang nasambit nga motorsiklo kag hungod nga ginbringka agud madasig nga kawaton.
Ginkompirmar man sang supervisor sang isa ka lending company sa Barangay Lawaan sining siyudad nga ginapanag-iyahan sang ginatrabahuan nga lending company ang narekober nga Suzuki Smash 115 nga motorsiklo sa balay ni Martinez sa Barangay Tiza sining siyudad.
Ginpahayag ni Willy Elig nga gintaban ang nasambit nga motorsiklo sang tinalikdan nga bulan sang pebrero matapos nga ginpark ini sa idalum sang building sang nasambit nga lending company.
Gindugang pa ni Elig nga nalipatan man nila nga e-lock ang motorsiklo rason nga madasig ini nga nataban sang suspetsado.
Samtang natumod man sang mga kapulisan ang tag-iya sang Suzuki Smash 115 nga narekober sa Barangay Ameligan, Pontevedra Capiz.
Gin-ako ni Alexander Martinez sa mga kapulisan nga ginkawat sini ang nasambit nga motorsiklo sa parking space sa isa ka supermart sa Burgos Street sining siyudad sang tinalikdan nga bulan sang Abril kag ginapag-iyahan ini ni Ryan Aporta sang Barangay Lawaan sining siyudad.
