Dakup ang duha ka mga taga Roxas City, Capiz matapos nadakpan sang kapulisan sa Iloilo nga nagapangawat sang kable sang TELCO sa Corner Delgado Mabini St., Barangay Liberation, Iloilo City.
Sila ang ginkilala kanday Rex Bonzato, 49-anyos, residente sang Barangay Bato kag Ulysez Manalo, 31-anyos, pumuluyo sang Barangay Culajao nga lunsay mga taga-syudad sang Roxas.
Suno kay PCPT Joebert Amado, OIC Station Commander sang Police Station 7 nga may nagreport sa ila nga may nagapangawat sang kable sang TELCO sa nasambit nga barangay gani ila ini ginrespodehan.
Pag-abot sa lugar, naabtan nila ang ang mga suspetsado nga nagbukas sang manhole sa ginapahamtangan sang mga kable sang PLDT apang nagdalagan ang mga ini sang makita ang presensya sang mga kapulisan.
Dugang pa ni Amado nga sa ila imbestigasyon nga ang mga kable sang TELCO nga ginapangkawat sang mga suspetsado ang ginadala sa iban na lugar kag didto ginabaligya.
Nagapati si Amado nga isa lang ka grupo ang mga nagapangawat sang kable sang telco kun sa diin nangawat man sila sang nagligad nga binulan.
Sa karun yara napreso ang duha ka mga suspetsado kag natalana nga pagapasakaan sang kaso samtang nagapadayon pa ang imbestigasyon.
