ROXAS CITY, CAPIZ- Padayon ang pagdamo sang mga Pilipino nga naga-angkon sang heart disease, ilabi na sang Ischemic Heart Disease kag Heart Failure, suno sa mga doktor.
Ang Ischemic Heart Disease ang isa ka balatian nga kun sa diin indi bastante ang dugo nga panalaytay sa corazon. Bangud diri, nagaluya ang pitik sang corazon kag nagakabudlayan ini nga magtrabaho sang maayos kag kun maglala ini, mahimo ini nga magresulta sa Heart Failure.
Sa interview sang Bombo Radyo kay Dr. Edher Lariosa, Medical Specialist II sang Mambusao District Hospital, iya ginpatpat ang mga kabangdanan sang sakit sa corazon sa diin amo ang mga masunod: pagpanigarilyo, pagkaon sang mantikaon kag maparat, kakulangan sa ehersisyo, tuman nga stress, kag pag-angkon sang high blood ukon diabetes.
Suno sa iya, agud malikawan ang kasubong nga balatian, magkaon sang masustansya, mag-ehersisyo adlaw-adlaw, likawan ang sigarilyo kag makahulubog nga ilimnon, kag regular nga magpalantaw sa doktor.
Dugang pa sang natungdan, ang insakto nga ihibalo kag pag-atipan sa lawas ang yabe agud malikawan ang delikado nga sakit sa corazon.
Interviewed by Bombo Roadnie Daban Dalanon
