ROXAS CITY – Ginkompirmar sang pamunuan sang Traffic Management Unit (TMU) nga nagasugod na ang ila nga pagpanakop sa mga indibidwal partikular na sa mga drivers sang salakyan nga wala nagasuksok sang faceshield kag facemask sa mga pampubliko nga lugar sa siyudad sang Roxas.
Sa interview sang Bombo Radyo kay Mr. Gonzalo Andrada, Head sang TMU, nga istrikto nga gina-implementar ang City Ordinance No. 044-2020 ukon mandatory nga pagsuksok sang facemask kag faceshield sa siyudad bilang paghalong sa COVID-19.
Suno kay Andrada nga may yara sang multa ang sin-o man madakpan nga wala nagasunod sa nasambit nga pagsulundan.
Ginklaro man sini nga dakpon man nila ang mga tawo nga nagasuksok lamang sang eyeshield kag indi sang faceshield bangud sandig sa nasambit nga ordinansa dapat may yara gid sang tabon ang mata, ilong kag baba.
Samtang, ang madakpan naman ang sarang nga magbayad sang P500 nga multa para sa first offense, P3,000 para sa second offense kag P5,000 para sa third offense.
Kun wala sang kuwarta ang madakpan, mahimo man nga magbayad pinaagi sa community service.
Nahibaluan nga ginadumilian naman ang pagsakay sa mga pampubliko nga salakyan nga wala sang ginasuksuk nga facemask kag faceshield.
Hugot man nga ginadumilian ang pagbiyahe nga wala sang ginasuksuk nga facemask kag faceshield para sa mga driver.
