Ginpahayag ni Lanao del Sur Representative Zia Alonto Adiong nga ang ginpatigayon nga imbestigasyon sang Senado may kaangtanan sa ginasiling nga flood control scam indi mahimo nga kilalahon bilang opisyal nga pagdinig ukon hearing. Suno sa iya, mahimo lamang ini nga isa ka ordinaryo nga pagtililipon sang pila ka mga senador kag wala sang pormal nga awtoridad sang Senado.
Suno pa kay Adiong, wala ini masulod sa opisyal nga rekord sang Senado bangud nagkulang sang mga kinahanglanon para sa isa ka pormal nga hearing, lakip na ang quorum, committee secretary, regular nga mga personnel kag mga stenographer nga nagarekord sang testimonya.
Tungod sini, ang mga testimonya sang 18 ka anay sundalo nga nag-angkon sang kaangtanan sa mga alegasyon sang kickback sa flood control projects wala mahimo nga mangin bahin sang opisyal nga dokumento sang Senado.
Ginduso man ni Adiong ang mga senador nga dayon nga sulbaron ang nagapadayon nga krisis sa liderato sang Senado agud mabalik ang kalig-on kag kredibilidad sang institusyon. Ginpabutyag man niya nga ang nagakatabo subong sa Senado nagadala sang personal nga pag-atake kag nagapadaut sa imahe sang institusyon.
Dugang pa niya, ginapaabot sang Kamara nga matuman gihapon sang Senado ang ila konstitusyonal nga obligasyon sa pagdumala sang nagahilapit nga impeachment trial batok kay Vice President Sara Duterte bisan ano pa ang mangin resulta sang isyu sa liderato.
