ROXAS CITY – Indi na halos makit-an ang mga tiningi nga gasolina nga narekober sa operasyon nga ginkasa sang Bureau of Fire Protection sa Roxas City Motorpool sa Barangay Dinginan, Roxas City.
Ini ang naobserbahan mismo sa pagbisita sang hubon sang Bombo Radyo sa amo nga lugar.
Apisar nagpamalibad nga maghatag sang iya nga audio interview ang officer-in-charge nga si Engr. Roger Baes, ginpahayag sini nga halos naubos na ang iban nga tiningi nga gasolina nga ginturn-over sa ila bangud ginagamit ini sa paghugas sa mga piyesa sang mga salakyan nga ginakaayo sa lugar.
Sa paglibot sang Bombo Radyo News Team sa amo nga talatapan, nakit-an ang madamo nga mga galon kag bote nga wala na sang unod.
Mahibaluan nga ang kapin 300 litros na lamang sang gasolina nga narekober sang BFP sa ila pinakaulihi nga operasyon ang nakit-an sa amo nga lugar.
Daku nga katilingalahan bangud sa nakuha nga impormasyon sang Bombo Radyo, humalin sang tuig 2015 nga pag-implementar sang ordinansa nga nagadumili sa pagbaligya sang tiningi nga gasolina sa siyudad, halos 3, 000 litros na sang gasolina ang narekober sang BFP nga ginturn-over sa Roxas City Motorpool.
Sang ginpangitaan sang Bombo Radyo ang pamunuan sang Roxas City Motorpool sang rekord sang mga ginturn-over sa ila nga gasolina, wala man ini sang may napakita kag nagpanugyan nga magpadulong na lamang sa pamunuan sang BFP bangud may yara man sang kaugalingon nga rekord ang nasambit nga ahensiya.
