Mga trabahador sa ginpauntat nga quarry operation, nagahinyu sa gobernador nga ibalik na ang ila pangabuy-anan

ROXAS CITY – Tuman nga palaligban sa mga trabahador nga nagaquarry sa Sitio Pangpang, Barangay Ilaya, Pontevedra kun diin pa sila makuha sang ila ibakal sang pagkaon bangud sa pagkadula sang ila pangabuy-anan.

Sa interview sang Bombo Radyo kay alyas “Dodoy”, dako nga epekto sa ila ilabi na sa ila pamilya ang pag-untat sang ila trabaho bangud ini lamang ang nagahatag sa ila income nga makakaon sa tagsa ka adlaw, kag nagahilapit naman ang bukas klase nga mangin galastusan para sa ila kabataan.

Luyag sang mga ini ipalab-ot kay Governor Fredenil “Oto” Castro nga buligan sila bangud wala sila kabalo sang ila himuon kag indi man nila luyag nga maghimo sang iligal agud makakaon, kun mahimo pa suno diri nga ibalik nalang ang ila pangabuy-anan.