ROXAS CITY – Plano sang Sangguniang Panlungsod nga amyendahan ang “Face Mask Ordinance” ukon hatagan sang multa ang mga tricycle drivers kag mga pasahero nga wala nagasuksuk sang face shield.
Ini ang ginpahayag ni City Councilor Gary Potato, Chairman sang Committee on Transportation and Public Utilities sang mainterview sang Bombo Radyo.
Ginpahayag ni Potato nga sa pihak nga may yara na sang mandato gikan sa Deparment of Transportation (DOTr) nga “No face shield, no ride policy” sa mga pampubliko nga salakyan, madamo sa gihapon ang wala nagasuksuk sang face shield.
Suno kay Potato nga wala ginasunod ang mandu sang DOT’r rason nga ginaduso karon sang Sangguninang Panlungsod nga hatagan sang multa ang mga tricycle driver’s kag mga pasahero nga wala nagasuksuk sang face shield.
Apang gin-athag sini nga ginatun-an pa sang konseho ang mga multa nga igapatuman kag wala sang kamatuoran ang nagalapta nga P5,000 nga multa sang violators sa first offense.
Magluwas diri, wala man sang kamatuoran nga kun wala sang suksuk nga face shield ang pasahero, ang tricycle driver ang hatagan sang multa.
Nahibaluan nga ginatun-an pa lamang ini sang Sangguniang Panlungsod kun ipatuman ang paghatag sang separado nga multa sa mga tricycle drivers kag pasahero nga magalapas sa ordinansa.
Nagapati man si Potato nga dako ang tsansa nga malikawan ang paglaton sang virus kun nagasuksuk sang facemask kag faceshield ang mga pasahero nga nagasakay sa mga pampubliko nga salakyan.
