Indi pabor ang pila ka mga tricycle driver sa Roxas City sa panawagan sang Philippine Rice Research Institute ukon PhilRice nga mag-half rice agud maminusan ang kakulang sang suplay sang bugas sa Pilipinas.
Sa interview sang Bombo Radyo kay Ian de Pedro, isa ka tricycle driver, iya ginpahayag nga mabudlay na ang pangabuhi sang madamo nga Pilipino bangud sa gamay nga kinitaan sa kada adlaw.
Suno kay De Pedro, may mga imol nga pamilya nga halos indi na makakaon sing tatlo ka beses sa isa ka adlaw bangud kulang ang ila kinitaan.
Ginahayag man sini nga madamo na nga Pilipino ang nagakulang sa sustansya bangud sa indi insakto nga pagkaon, gani para sa iya, indi solusyon ang pagpa-half rice.
Nagpanawagan man ini nga dapat suportahan ang mga mangunguma agud masiguro ang bastante nga suplay sang bugas sa pungsod.
