Nabalaka karon ang mga tricycle drivers bangud kasunod sa pagpaidalum sa Modified Enhanced Community Quarantine (MECQ) sang Roxas City buwas nga adlaw ang pagpatuman sang mga restrictions kag sigurado nga apektado naman ang ila nga palangabuy-anan.
Sa pagpakig-angut sang Bombo Radyo News team kay Ian de Pedro, isa ka tricycle driver, ginpahayag sini nga sigurado nga mabudlayan naman sila bangud mabalik naman sa one passenger per tricycle ang ila nga biyahe.
Kun tan-awon, apektado na ang ila palangabuy-anan sa libre sakay sang mga MPUJs kag pandemya nga tuga sang COVID-19 kag dugangan pa gid ang pagpaidalum sa MECQ sang Roxas City.
Nag-apelar ini sa Roxas City government nga padasigon na ang ginpromesa nga napulo ka kilo nga bugas kada bulan sa mga tricycle drivers bangud tobtob sa karon wala pa sila sang may nabaton nga bugas.
Samtang indi mag-utang si de Pedro sa kontrobersiyal nga P10,000 nga loan nga iga-finance sang Hublag Gerry Roxas foundation apisar pa nga abagahon sang gobyerno sang syudad ang interes, bangud mabug-at sa ila nga mga tricycle drivers ang short term payment nga apat ka bulan.
#OverAllConsistentNumber1saCapiz
#BastaRadyoBOMBO
