Tuman nga apektado ang palangabuy-anan sang mga tricycle driverS karon nga ginpaidalum sa Modified Enhanced Community Quarantine (MECQ) ang syudad sang Roxas sa diin ginbalik sa 1 passenger policy ang magasakay sa isa ka tricycle.
Ginpahayag ni Manong Gary nga mabudlay sa ila bahin nga ginbalik sa isa ka pasahero ang ila sarang mapasakay bangud kadam-an nga nagasakay ang may kaupod ukon duha sila nga pasahero .
Bangud indi luyag magbulag ang duha ka mga pasahero rason nga nagasakay na lamang sila sa libre sakay sang mga MPUJs.
Ginkumpirma man ni Manong Gary nga iban sini nga mga kaupdanan nga tricycle driver ang ginpakamaayo nga magpahuway na lamang bangud pierde sila sa kita sa ila pagbiyahe karon nga yara sa MECQ ang Roxas City.
Ginhinyo ni Manong Gary sa alkalde sang syudad nga kuntani pahanugutan sila nga makapasakay sang duha ka mga pasahero para bisan paano mabuhi man nila ang ila pamilya.
Samtang ginpahayag naman sang dispatcher sang Ceres Bus Liner nga ginapangitaan lamang sang appointment slip kag ID ang mga pasahero nga magasakay padulong sa Iloilo kag ginapamangkot kun ano ang ila tinutuyo sa pagpadulong sa lugar.
Sa mga L300 van siyam lamang ka mga pasahero ang ginapahanugutan nga makasakay kag istrikto nga ginapatuman ang no face mask, no face shield no ride policy, bilang pagsunod sa pagsulundan.
