ROXAS CITY-Magabalik na sa pagbiyahe buwas nga adlaw (Mayo 1) ang pila ka mga Franchised Tricycle sa siyudad kasunod sang pagpaidalum na sa probinsiya sang Capiz sa General Community Quarantine.
Ini ang ginkompirmar mismo ni Traffic Management Unit (TMU) Head Mr. Gonzalo Andrada sang mainterview sang Bombo Radyo.
Suno kay Andrada nga magabiyahe na buwas nga adlaw ang mga tricycle sa siyudad apang isa gid lamang ka pasahero ang pagsugtan nga makasakay.
Gin-athag man sini nga limitado kag indi tanan nga mga franchised tricycle ang pasugtan nga makabiyahe bangud hugot nga igapatuman ang number-coding scheme.
Suno kay Andrada nga ang mga tricycle nga nagatapos ang city number sa 1 kag 2 ang magasugod sang biyahe subong nga adlaw.
Ginkompirmar man sini nga nagaapelar ang mga tricycle driver nga magpasaka sang pletehan apang ginatugyan ni Andrada sa Roxas City council ang pagdesisyon natuhoy diri.
Nagpanugyan naman si Andrada sa mga pasahero nga magsuksok sang facemask kg magdala sang quarantine pass samtang sa mga tricycle driver magdala sang alcohol kag mga disinfectants.
Ginkompirmar man ni Andrade nga untaton na ang pagtanyag sang libre nga sakay kasunod sang pagbalik na sang biyahe sang mga tricycle sa siyudad.
