Pagaatubangon sa gihapon sang mga undocumented Filipino immigrants sa Estados Unidos ang deportation crackdown sang administrasyon ni Trump batuk sa mga illegal immigrants.
Suno kay Philippine Ambassador to the United States Jose Manuel Romualdez, pila ka mga bag-o abot nga Filipino ang nakabaton na sang abiso nga sila ang igapa-deport pabalik sa Pilipinas.
Apisar nga indi pa sigurado ang numero sang mga apektado nga indibidwal, kadam-an sa ila ang napahayag nga yara sa estado nga may dalagko nga komunidad sang Filipino kaangay sang California, New York, kag New Jersey.
Bangud sini, ginganyat ni Romualdez ang mga apektado nga mga Filipino nga sa karun yara nagapuyo sa Estados Unidos nga magpangita sang legal nga pamaagi agud mapabilin ang mga ini sa pungsod.
Matandaan nga ang nasambit nga crackdown, kadungan sang mga pahayag sadtong Enero nga 24 ka mga undocumented nga Filipino ang kalakip sa “petty crimes” ang na-deport sa idalum sang administrasyon ni Biden.
Gintalakay man ni Romualdez ang posibilidad sang pagpabilin sang mga Filipino sa U.S. kung matinlo ang ila immigration history.
Dugang pa sang Embahada nga ang mga Filipino nga nagapuyo sa U.S. sang masobra lima ka tuig, nagtrabaho kag nagabayad sang buwis may mataas nga tsansa nga himuon legal ang ila pagpabili, ilabi na kung sila nagsulod sa pungsod gamit ang valid nga work visa, apisar nga ini nagsulod na sa expiration.
Apang, ginhatagan man sang pagtamud sang embahada ang iban nga sitwasyon sang mga nag-abot gamit ang tourist visa.
Matandaan nga sang damlag lang ginlunsyar sang U.S. Department of Homeland Security ang isa ka ad campaign nga nagaganyat sa mga illegal immigrants nga maghalin na kag likawan ang posible nga deportation.
Sa pihak sang ginpatigayon nga immigration crackdown, ginsiguro ni Romualdez nga nagapabilin nga mabakos ang relasyon sang Pilipinas kag Estados Unidos sa idalum sang ika-duha nga termino ni US President Donald Trump.
Ginsiguro man sini nga wala sang mangin dako nga pagbag-o sa duha ka pungsod.
Samtang, ang Department of Foreign Affairs (DFA) kag Department of Migrant Workers (DMW), nag-alokar sang pondo para sa legal, pinansyal, kag medikal nga bulig para sa mga apektado nga Filipino, samtang ang Department of Labor and Employment (DOLE) nagtan-ay naman sang suporta sa mga Pilipino nga mapapauli sa Pilipinas.
