Ginapaidalom man sa lifestyle check sang National Bureau of Investigation ukon NBI Central Office ang mga utod ni Capiz Gov. Antonio del Rosario nga may mga pwesto sa gobyerno.
Ini ang ginkumpirmar sang Sports and Business Affairs consultant sang Capiz Provincial Government nga si Mrs. Carmen Andrade sang mainterview sang Bombo Radyo.
Suno kay Andrade nga nagpadulong man ang mga taga-NBI sa ila nga balay kag mga propedad agud kuhaan sang mga laragway kadungan sang ginpatigayon nga pagpangusisa sa mga residente.
Apang ginpahayag sini nga wala sila mahadlok bangud ginapanindugan nga naggikan sa matinlo nga pamaagi ang ila maayo nga pagpangabuhi sa karon kalakip na ang ila mga propedad.
Gindugang pa ni Andrade nga makabulig man ang ginapatigayon nga lifestyle check agud matinluan ang ila pangalan nga gina-angot sa korapsiyon ilabi na ang gobernador sang probinsiya.
Nagalaum man ini nga ipaguwa sang NBI ang ila findings agud mauntat na ang mga gina-akusar batuk sa ila nga suno sa iya lunsay mga kabutigan.
Mahibaluan nga magluwas kay Andrade ginapaidalom man sa lifestyle check ang utod sini nga si Mrs. Melanie Arancillo nga pinuno sang Hospital Management Office sang kapitolyo probinsiyal.
