Epektibo subong nga hapon indi na pagpahanugutan kag dumilian na ang mga vendors nga makabaligya sa dalan Burgos bangud sa wala pag-obserbar sang social distancing.
Ginpahayag ni Mayor Ronnie Dadivas nadihon ang nasambit nga lihok kasunod sa ginpatigayon nga hinun-anon sang COVID enforcers nga ginalakipan sang composite team gikan sa city government, Philippine National Police, Philippine Army kag Bureau of Fire ProtectioN
Suno sa alkalde natalupangdan nga ginapunsukan sang madamo nga mga tawo kada hapon tobtob gab-I ang baligya sang mga vendors sa Burgos St. kag wala ginasunod ang social distancing.
Ini sa pihak nga nagpahamtang na sila sang sign para makita sang mga pumuluyo nga kinahanglan nila magdistansiya, apang kasubong nga ginabalewala lamang ini sang mga tawo.
Indi luyag ni Mayor Dadivas nga ang pagtumpok sang mga tawo nga nagapamalaklon sa dalan Burgos ang halinan para maglapta ang virus kag madamo ang malatnan.
Bangud diri nadesisyunan nga dumilian na ang mga vendors nga magbaligya sa dalan Burgos.
Apang antes ginpatigayon ang pagbawal sa mga vendors, nagpakig-angut na sila sa nagkalain lain nga mga asosasyon agud ma-imporma ang ila mga miyembro.
Indi man madulaan sang palangabuy-anan ang mga vendors, bangud gn-relocate sila sa TATC.
Agud masiguro nga indi na makabalik ang mga vendors sa dalan burgos para makabaligya, ginpahamtangan sang composite team ang lugar nga magasita sa salawayon nga mga negosyante.
Nahibaluan nga temporaryo nga magabaligya sa TATC ang mga vendors sa Burgos St., sumugod subong nga adlaw tobtob matapos ang MECQ.
Ginklaro pa sang alkalde ang ginaprotektahan lamang sang gobyerno ang bug-os nga komunidad agud indi na magtaas sang kaso sang COVID-19.
Liwat man ginpahanumdum sang opisyal ang hugot nga pagdumili sa mga restaurants nga makapa-dine-in sang ila mga costumers, apang mahimo lamang sila nga makapa-take out.
Samtang ginkumpirma sang alkalde nga ginpaidalum sila nga magpamilya sa home quarantine matapos nga naka-angkon ini sang close contact sa isa ka COVID-19 positive. Apang suno sa alkalde nga maayo man ang ila lawas sang iya pamilya kag wala sila sang kun anuman nga sintomas sang COVID-19
