ROXAS CITY – Matapos nagviral ang CCTV footage sang ginaalegar pagkidnap kay Patroceño Don Chiyuto, CEO sang Double your Money Investment Scheme, mayorya ang nagasiling nga scripted ukon drama lamang ang natabo kag kabahin lamang ini sang grand plan ni Chiyuto nga indi pag-ibalik ang investments sang mga investors.
Sa pagpakig-angut sang Bombo News Team sa mga vendors sa Teodoro Arcenas Trade Center (TATC) nga isa man sa apektado nga sektor bangud madamo sa ila ang nangin investors, kadam-an sa mga ini ang indi magpati nga ginkidnap si Don Chiyuto.
Ginpahayag ni Mrs. Borres, flower vendor nga investor man ini matapos nga nagpay-in sang P15,000 sang Disyembre 19, 2020.
Suno sa ginang nga ginprenda sang bana ang pension sini sa ATM card nga napartenisir kuntani sa ila bulong agud makapay-in matapos ginpasalig nga ma-doble ang nasambit nga kantidad pag-abot sang bulan sang Enero.
Apang nadismaya sang nagdeklara sang holiday si Chiyuto tobtob nga wala na ini nakapa-pay-out tobtob subong.
Gintumod sang ginang nga nagabaligya na lamang ini sang bulak agud may magamit sila sa pagbakal sang ila bulong.
Sa pihak sang naglapta nga report nga ginkidnap si Chiyuto, nagasalig sa gihapon ang ginang nga mabalik ang iya kuwarta.
Samtang nagalaum naman ang isa ka vendor nga mabalik ang gin-invest nga P10,000 sa Double your Money Investment Scheme.
Kasubong sang kadam-an, indi man ini magpati sa nagalapta nga kontrobersiyal nga CCTV footage sa pagkidnap kay Chiyuto bangud kasubong nga drama lamang ang tanan.
Apang nagapangamuyo ini nga mabalik sa iya ang investment, bisan kapital na gid lamang.
