Nagapanawagan si Colonel Erwin Rommel Lamzon, Assistant Division Commander of Administration sang 3rd Infantry Division, Philippine Army sa mga miyembro sang New People’s Army nga ipaagi sa husto kag legal nga proseso ang ila mga reklamo ukon sentimiento batok sa militar kag gobyerno.
Sa interview sang Bombo Radyo kay Colonel Lamzon, iya ginpahayag nga handa ang militar nga makighinun-anon kag magpamati sang ila luyag nga ipalab-ot agud malikawan ang kun ano man nga posible kabangdanan sang pagkadula sang kabuhi.
Dugang pa sini, may yara sang grievance system ang mga Local Government Units kag ang National Government nga pwede gamiton sang mga rebelde agud mahatagan sang solusyon ang ila ginapakigbato.
Nahibaluan nga may pila ka mga reklamo ang mga rebelde nga grupo angut sa ginaalegar pagpanulod-sulod sang mga military sa mga kabalayan nga wala sang nagakaigo nga permiso sa diin hugot nga ginsiling ni Colonel Lamzon nga wala ini sang kamatuuran.
Para kay Lamzon, mas maayo nga magpasaka sang ligal nga kaso ang mga NPA bangud handa ang militar nga depensahan ang ila kaugalingon sa ligal nga pamaagi, kag kabahin man ini sang ila trabaho.
Ginsiling pa ni Lamzon nga kinahanglan na nga untaton sang mga rebelde ang pagpanago sa kabukiran kag mga komunidad kag untaton man ang pagpalapnag sang mga istorya nga wala sang kamatuoran.
In an interview with Bombo Francis Biñas
