Militar handa tinluan ang pangalan sang Capizeño nga nasal-an nga NPA lider kun tapos na ang validation

ROXAS CITY– Handa nga tinluan sang pamunuan sang 3^rd Infantry Division Philippine Army ang pangalan ni Baltazar Saldo sang Barangay Sto. Angel, Dumalag, Capiz, ang driver nga nasal-an nga anay  commanding officer sang Roger Mahinay Command, Komiteng rehiyon-Negros ng Communist Party of the Philippines-New People’s Army (CPP-NPA), kun magguwa nga nakaangkon sang  mistaken identity ang pag-aresto diri.

Suno kay Army Captain Cenon Pancito III, spokesperson sang 3^rd ID, nga padayon sa karon ang validation sang militar sa diin nagabulig sila sa Philippine National Police sa pagpangita sang dugang nga impormasyon kag witnesses.

Ginatutukan man nila ang nangin pahayag sang witness nga indi si Saldo ang ginapangita nga si Virgilio Paragan nga may apat ka warrants of arrest.

Sa tion mapamatud-an nga nagbutig ang witness may yara ini sang salabton sa laye.

Samtang ginklaro sang opisyal nga trabaho sang pulis ang magserbe ng warrant of arrest kag nangin papel lamang nila sa pagdakup kay Saldo sang nagligad nga Domingo ang dugang nga pwersa sa PNP, bangud ang ila pagadakpon ang anay  commander sang rebelde nga grupo.

Sa karon indi pa makapat-ud ang militar nga mistaken identity lamang ang natabo bangud wala pa natapos ang ila balidasyon.