Ginkumpirma sang spokesperson sang 3ID Philippine Army ang engkwentro sa tunga sang 12th Infantry Battalion Philippine Army kag mga miyembro sang CPP-NPA sa idalum sang SDG Igabon Platoon sang Central Negros Front ng Kilusang Rehiyon Panay sa Barangay Alabidhan, Bingawan, Iloilo.
Ginpahayag ni Major Cenon Pancito III, nagapatrolya ang militar sa lugar sang maka-engkwentro ang lima ka mga rebelde sa diin nagdugay ang pagbayluhanay sang luthang sa sulod lima ka minuto antes nagwithdraw ang mga NPA.
Wala sang napilasan sa bahin sang militar kag padayon nga ginahibalo kun may napilasan ukon nangin kaswalidad sa mga rebelde.
Na-rekober sang tropa sang gobyerno sa ginluntaran sang engkwentro ang duha ka home-made shotgun, duha ka magazine sang shotgun nga may 10 ka ammunition, isa ka magazine sang 9mm pistol nga may pito ka ammunition, carbine ammo, duha ka backpacks, grocery items, duyan, tsinelas, raincoat, shrapnel nga ginagamit sa paghimo sang landmine, 15 metros nga electrical wire kag DVD propaganda materials.
Nahibaluan nga istelo sang NPA nga magre-group sila sa gamay nga kag magpadulong sa mga komunidad, magpangayo sang pagkaon kag magrecruit sa mga lamharon.
Natabuan man nga nagapatigayon sang pista ang amo nga barangay kag posible nga ila ginhingalitan ang kahigayunan nga makapangayo sang pagkaon.
Samtang gin-athag ni Pancito nga ang pagharass sang NPA sa militar sa Barangay Lahug sa banwa sang Tapaz sang damlag lang ang pamaagi sang hublag agud indi mapadayon ang ginapatigayon nga community support program sang gobyerno.
Ginasiguro sang community support team nga klaro na ang mga barangay sa presensiya sang mga NPA.
Pinaagi sa programa mapabalik ang kumpyansa sang gobyerno sa militar kag tuldukan na ang suporta sa NPA.
Ini ang ginahadlukan sang mga rebelde suno kay Pancito bangud kun matabo, mangin makitid na ang ila dalan kag indi na sila makapadamo sang ila sumulunod.
