JAMINDAN, CAPIZ – Padayon nga ginapadalman sang mga otoridad ang imbestigasyon angut sa pagkapatay sang isa ka katapo sang Philippine Army matapos ginaalegar ginlabo sang isa ka miyembro sang Citizen Armed Forces Geographical Unit (CAFGU) sa Barangay Jaena Sur, Jamindan, Capiz.
Ginkilala ang biktima nga si Technical Seargent Reynaldo Bueron Montinola, 49-anyos nga residente sang Bacolod City, Negros Occidental. Samtang, ang ginatudlo nga suspek amu si Larry Mariano Torreblanco, 37-anyos nga residente naman sang Barangay Jaena Sur, Jamindan, Capiz.
Suno kay Colonel Erwin Rommel Lamzon, Chief sang 3rd Division Public Affairs Office, indi pa maathag kun may natabo nga indi pag-intindihanay sa tunga nanday Montinola kag Torreblanco. Sandig sa ila pagpangusisa, antes ang insidente malipayon pa suno diri sang aga ang duha nga nagaistoryahanay samtang nagaubra sang fishpond sa sapa.
Sa imbestigasyon sang kapulisan, nabatian na gid lamang sang isa ka residente ang singgitan nga may nagapangayo sang bulig sa lugar. Madasig sini nga ginpadulungan ang lugar kag diri nakit-an ang biktima nga nagahigdaon sa duta nga may pilas sa magkatuhay nga parte sang kalawasan, samtang nagahigdaon man sa ingud sini ang suspek nga may ginahawiran nga binangon kag may pilas sa liog kag tiyan.
Gilayon nga gindala ang biktima sa Dao District Hospital, apang gindeklarar ini nga dead on arrival sang attending physician. Samtang, padayon naman nga ginabulong sa Roxas Memorial Provincial Hospital ang miyembro sang CAFGU nga ginatudlo suspek sa pagpanglabo sa biktima.
Sa karon, ginahulat nalang ang resulta sang autopsy sa bangkay sang biktima kag padayon ang imbestigasyon sang mga otoridad angut sa nasambit nga insidente.
