ROXAS CITY – Magapabilin nga yara sa ‘defensive mode’ ang militar sa probinsiya kasunod sang deklarasyon ni Presidente Rodrigo Duterte sang Suspension of Military Operations (SOMO) batuk sa Communist Party of the Philippines-New Peoples Army-National Democratic Front (CPP-NPA-NDF).
Ini ang ginpahayag sang tigpamaba sang 3rd Infantry Spearhead Division sang Philippine Army nga si Capt. Eduardo Precioso, Jr sang mainterview sang Bombo Radyo.
Suno kay Precioso, magasunod ang mga ini sa deklarasyon sang presidente nga untat-lupok nga magasugod sa Disyembre 24, 2017 kag magatapos sa Enero 2, 2018.
Ginpahayag pa sini nga ila ginarespeto ang presidente kag nagasalig sa rason sang presidente angut sa nasambit nga deklarasyon.
Sa pihak sang pormal na nga pagdeklarar sang presidente sang untat-lupok, ginpasiguro sini nga magapadayon ang militar sa pagprotehir sa mga pumuluyo batuk sa CPP-NPA nga ginakabig na sang presidente nga mga terorista nga grupo.
Gin-athag sini nga sa pihak nga wala sila sang patigayunon nga opensiba, nakahanda nga magdepensa ang militar sa anuman nga posible pagluntad sang kalakasan.
Nagalaum man ang militar nga respetuhon sang CPP-NPA ang deklarasyon sang presidente bangud indi lamang para sa militar ang pagdeklarar sang untat-lupok kundi para sa tanan nga mga pumuluyo nga nagalaum sang kalinong sa ila pagselebrar sang Paskwa kag pagsug-alaw sang Bag-ong Tuig.
