DAVAO ORIENTAL, Philippines – Nakuhaan sang litrato ang duha ka Mindanao bleeding-heart “Gallicolumba Crinigera”, sa Mount Hamiguitan Range Wildlife Sanctuary sang Hulyo 29, 2026 sa ginpatigayon nga Biodiversity Assessment and Monitoring System ukon BAMS activity.
Sa impormasyon nga ginpagwa sang Department of Environment and Natural Resources “DENR”, Davao Region antes sang opisyal nga dokumentasyon, aksidente man nga nasiplatan sang isa ka biodiversity monitoring intern ang isa ka specie sa lugar, kun sa diin nakita ang isa ka lalaki nga Mindanao bleeding-heart nga nagapakita sang courtship display sa isa ka babayi, nga nakitaan sang posibilidad nga may breeding activity sa sanctuary.
Suno sa DENR Davao Region, ang pinakabag-o nga kumpirmado nga record sang pagdokumento sang Mindanao bleeding-heart natabo sang Agosto 8, 2019, gani daku ang importansya sang bag-o nga dokumentasyon sa padayon nga conservation efforts.
Kilala ang Mindanao bleeding-heart isa ka ground-dwelling dove nga endemic sa Pilipinas, samtang makita lamang ini sa Mindanao, Basilan, Samar, Leyte, Bohol kag Dinagat Islands, nga nagapuyo sa primarya kag sekondarya nga lowland rainforests.
Sandig sa DENR Administrative Order No. 2019-09, ang amo nga specie ang nalakip sa Vulnerable category, nga nagakahulugan nga yara ini sa mataas nga risgo sang pagnubo sang populasyon kun magpadayon ang iligal nga wildlife trade kag mahimo ang pagkadula sang habitat.
Sa karon bangud sini, padayon nga ginapalig-on sang DENR ang pagpatuman sang conservation measures, kampanya batok sa iligal nga pagpangdakop kag pagbaligya sang wildlife agud maprotektahan ang pagkadula sang Mindanao bleeding-heart.
