ROXAS CITY – Magapabilin sa gihapon ang pagpatuman sang minimum health protocol sa mga border checkpoint sa probinsiya sa pihak nga mapaidalum na sa Modified General Community Quarantine (MGCQ) ang Capiz sumugod buwas nga adlaw sang Lunes, Hunyo 1, 2020.
Ginpahayag ni Police Col. Julio Gustilo Jr., Provincial Director sang Capiz Police Provincial Office (CPPO) nga sa pihak nga yara sa MGCQ ang probinsiya, apang
kun makita nga wala nagasunod sa minimum health protocols ang sakay sang pribado nga salakyan kag mga PUVs, sila ang pagasitahon kag paandaman subongman pasuksukon sang face mask nga isa sa mga pagsulundan sang health safety protocols.
Kinahanglan man suno kay Gustilo nga sundon ang 50 percent sitting capacity sang pampubliko nga salakyan sang mga drivers kun indi nila luyag nga sitahon ukon ma-delayed ang biyahe, bangud magapabilin sa gihapon ang border checkpoint tobtob nga wala pa sang mandu ang pamunuan sang PNP nga dulaon na ini.
Nagpanugyan man ang opisyal nga indi na kinahanglan pa ang kun anuman nga mga clearances ukon sertipikasyon kun magbiyahe buwas nga adlaw, apang mas maayo nga magdala sang ID ang mga sakay.
Subongman i-obserbar ang physical kag social distancing bisan sa sulod na sang salakyan kag magsuksok sang face mask.
Samtang ginkumpirma ni Col. Gustilo nga magapadayon ang curfew hour sa probinsiya sang Capiz.
Suno diri nga mayorya ang nagapabor nga ipabilin ang curfew hour bangud nangin matawhay ang probinsiya sang ginpatuman ini sang bulan sang Marso.
Talalupangdon man nga 50 porsyento nga nagnubo ang crime incident sa probinsiya bangud tanan halos ang yara na sa ila balay antes pa man mag-abot ang alas 9 sa gab-i.
Apang nahibaluan nga sa Roxas City ipatuman ang curfew hour humalin alas 11 sa gab-I tobtob alas 4 sa aga agud mahatagan sang kahigayunan ang mga negosyante nga makabawi matapos ang tatlo ka bulan nga pag-untat sang ila nga operasyon.
Samtang ginpahanumdum man ni Gustilo ang pagdumili sa gihapon sa pag-inum sa guwa sang balay sa pihak nga ginlift na ang liquor ban.
