ROXAS CITY – Nagpanic buying sa karon ang mga tawo sa Singapore matapos ginpataas sang Ministry of Health ang Disease Outbreak Response System Condition ukon DORSCON level sa Orange.
Nagakahulugan ini nga severe na ang nCoV kag madasig nga maglapta pinaagi sa tawo kag tawo nga makaangkon sang close contact.
Sa report ni Bombo International Correspondent Alma Avelino, residente sang Roxas City kag nagatrabaho sa Singapore, malaba ang pila sa mga supermarkets, bangud ginpakyaw na sang mga tawo ang mga baligya sa sulod sang balaligyaan.
Nahadluk na ang mga tawo sa Singapore nga magsarado ang mga balaligyaan ukon maubusan sila sang mabaklan sang pagkaon gani nagdaguso sila para magpamakal kag magstock sang nagapanguna nga kinahanglanon nila sa sulod sang balay.
Kalakip sa mga ginpamakal sang mga pumuluyo amo ang noodles, bigas, tissue paper, mineral water, canned goods kag sabon.
Nahibaluan nga naglab-ot na karon sa 33 ang kumpirmado nga nCoV cases sa pungsod Singapore.
