ROXAS CITY – Arestado ang 43-anyos nga mister matapos nga nakuhaan sang indl lisensyado nga armas-luthang sa isa ka bilasyunan sa Barangay Bilao, Sapian, Capiz.
Ginkilala ang arestado nga si Romel Padrogado 43-anyos kag residente sang nasambit nga lugar.
Sandig sa inisyal nga imbestigasyon sang mga kapulisan nagaguwa nga nagresponde ang mga katapo sang Sapian Municipal Police Station sa nasambit nga bilasyunan kun sa diin nadakpan sa akto nga nagasukbit sang armas-luthang si Padrogado.
Wala sang may ginpakita nga mga dokumento si Padrogado rasun nga gin-aresto ini sang mga otoridad.
Narekober sa posisyon ni Padrogado ang isa ka unit sang kalibre .45 nga armas-luthang kag may yara sang pito ka bala.
Nahibaluan nga yara sa idalom sang impluwensiya sang makahulubog nga ilimnon si Padrogado.
Sa karon nakahunong na sa karsel sang Sapian Municipal Police Station si Padrogado kag natalana nga pasakaan sang nakaigo nga panombongon.
