ROXAS CITY – Arestado ang isa ka mister matapos nga nadakpan sa ginkasa nga drug buybust operation nga ginkasa sang Station Drug Enforcement Team sang Roxas City Police Station kag Philippine Drug Enforcement Agency sa Sitio Sumiga, Barangay Milibili, Roxas City.
Ginkilala ang arestado nga si Nicanor Macalintal, 46-anyos residente sang Sitio Nipa, Barangay Culasi Roxas City.
Nakuha sa posesyon ni Macalintal ang 9 ka mga sachets sang ginasuspetsahan shabu, P1,000 nga buybust money kag iban pa nga mga drug pharaphernlia.
Suno sa mga kapulisan ginabulubanta 8 gramos ang kabug-aton sang mga narekober nga mga plastics sachets nga may yara sang street market value nga nagalab-ut sa P100,000.
Ginpahayag ni Police Master Sergeant Ramil Arcangeles nga si Macalintal ang subject sa buybust operation sa Sitio Nipa, Barangay Culasi sining siyudad apang nakatigayon nga makapalagyo.
Gindugang pa ni Arcangeles nga nakabaton sang impormasyon ang mga kapulisan nga sa Barangay Milibili nakit-an ang presensya ni Macalintal rason nga ginkasa ang nasambit nga operasyon.
Ginpahayag pa sini nga nagaserbe nga drug den ang ginadayunan nga hulot ni Macalintal kun sa diin sa nasambit nga hulot man mismo nagagamit sang droga ang iya sini nga mga parokyano.
