ROXAS CITY –Dako ang pagpasalamat sang 27-anyos nga mister matapos nga nagbalik ang maayo nga tamdanay nila sang iya asawa nga una sini nga ginreklamo sang pagpanakit sa Bombo Radyo.
Ini ang ginpahayag ni Michael Christian Singh sang liwat sila nagpadulong sang misis nga si Mary Angel Singh sa Bombo Radyo.
Ginpahayag ni Michael nga ginhatagan ini sang last chance sang asawa matapos nga nagpasalig nga dulaon ang bisyo nga ginakaakigan sini.
Aminado ini nga may yara siya sang nangin kasaypanan sa asawa apang nagpasalig man ini nga tinguhaan nga mapun-an ini sa ila liwat nga pag-updanay.
Nagpangayo man sang pasaylo si Michael sa mga indibidwal nga naapektuhan sa natabo sa ila nga mag-asawa ilabi na sa mga ginikanan ni Mary Angel.
Nagpasalamat man ini sa mga nagbulig nga mga indibidwal kag naghatag sang advise sa gina-atubang nila nga problema bangud aminado ini nga kulang sila nga mag-asawa sa laygay.
Gindugang pa sini nga wala ini naghinulsol nga nagdangop sa Bombo Radyo sa pihak nga madamo sang mga tawo ang nagpakamalaut sa iya.
Suno sa kay Michael nga dako ang nabulig sang Bombo Radyo sa ila liwat nga pag-ayuhay sang iya asawa.
Samtang excited naman ini nga makita ang anak nga ginadala sang iya misis.
Tuman naman ang kalipay ni Mary Angel matapos nga liwat sila nag-ayuhay sang iya bana.
Sa ila pagpadulong sa Bombo Radyo, ginpahayag ni Mary Angel nga nagmag-an ang balatyagon sini matapos nga nag-intiendihanay na sila sang bana.
Suno sa iya nga nabinag-binag sini nga hatagan sang ‘last chance’ ang bana bangud nagpasalig ini nga magbag-o kag bayaan na ang bisyo nga iya ginakaakigan.
Aminado si Mary Angel nga nakapoy na siya sa pag-ugtas sa bana apang nagpangibabaw sa gihapon ang pagpalangga niya diri.
Naka-realisar man sini nga kinahanglan ang pag-istoryahanay sang mag-asawa sa tion nga may yara sang indi pag-intindihanay.
Samtang ginpasalig man ni Mary Angel nga likawan ang pagsakit sa bana kun may yara sila sang indi pag-intiendihanay.
Samtang, magapatigayon sang isa ka ‘dinner date’ ang Bombo Radyo para sa mag-asawa.
Nagpabutyag man ang lokal nga gobyerno ang siyudad sang Roxas nga buligan nga maka-angkon sang trabaho si Michael.
