ROXAS CITY – Karsel sang Pontevedra Municipal Police Station ang gindangatan sang 49-anyos nga mister matapos nga nakuhaan sang duha ka mga armas luthang samtang ginasakit sini ang asawa sa Barangay Binuntucan, Pontevedra, Capiz.
Ginkilala ang suspek nga si Juan Ginoy sang amo man nga lugar.
Base sa inisyal nga imbestigasyon sang mga kapulisan, nagatuga sang kinagamo ang amo nga suspek kun sa diin ginaalegar nga ginasakit sini ang iya asawa.
Bangud diri, gilayon man nga nagresponde ang mga katapo sang Pontevedra PNP kun sa diin narekober ang isa ka 12 Gauge Homemade Shotgun kag isa ka unit sang .38 caliber nga may duha ka mga bala.
Magapangatubang naman sang panumbungon nga paglapas sa RA 9262 (Anti-Violence Against Women and their children) kag RA 10591 (Comprehensive law on firearms and ammunition) ang nasambit nga suspek.
