SIGMA CAPIZ – Ginbuno mismo sang isa ka mister ang iya kaugalingon matapos nga gin-ayad dusak sang kutsilyo ang mismo man sini nga asawa sa Barangay Mianay, Sigma Capiz.
Sa interview sang Bombo Radyo sa hepe sang Sigma Municipal Police Station nga si PCapt. Mark Anthony Garcia, iya ginpahayag nga personal nga nagpadulong sa ila talatapan ang anak sang biktima agud ipabalhag nga may nagluntad nga pagbinun-anay sa ila puluy-an.
Suno kay PCapt. Garcia, ginkilala ang biktima kay Lorna Donasco, 50-anyos, samtang ang ginapahayg suspek ang ginkilala kay Eduardo Donasco, 60-anyos, lunsay mga residente sang nasambit nga lugar.
Base sa pagsaysay ni Arnold Donasco anak sang biktima kag suspek, nagbinaisay ang iya sini mga ginikanan tubtob nga gin-ayad buno sang iya sini amay ang iloy gamit ang isa ka kutsilyo.
Bangud sa natabo, gilayon ini nga nagpangayo sang bulig sa mga kapulisan agud mapadangat sa Dao District Hospital ang biktima samtang sa Mambusao District Hospital naman ang suspek samtang naka-ungot pa ang kutsilyo nga gingamit man mismo sa pagbuno sa iya kaugalingon.
Mahibaluan nga pagpangimon ang ginalantaw nga motibo sa nagluntad nga krimen.
