ROXAS CITY – Kumpirmado nga bangud sa pagpangimon, ginsunog sang isa ka Mister ang ila kaugalingon nga puloy-an sa Barangay Cogon, sini nga syudad, alas-7:52 kagab-i, Hunyo 4.
Ginkilala ang suspek kay Oliver ‘Dodong’ Casador, 40-anyos, mangingisda kag residente sang nasambit nga lugar.
Sandig sa impormasyon nagikan sa mga katapo sang kapulisan, nga ginkaakig sang mister nga wala ang iya misis sa ila balay, sang nag-abot ini nagikan sa lawod.
Bangud sini, nakit-an ang mister nga nagdap-ong sa guwa sang ila puloy-an apang sang ulihi, gin-aku sang suspek nga ginsug-an sini ang ila balay.
Wala sini makontrol ang kalayo rason nga naulamid ang puloy-an sang iya amay kag utod.
Nahibaluan nga nagpadulong sa Sapian ang ginkaimonan sini nga Misis bangud ginaalegar sini nga nagpamayle.
Natalupangdan man nga yara sa impluwensiya sang makahulubog nga ilimnon ang mister sang natabo ang insidente.
Ginabulubanta nga may kahalitan nga P50,000 ang tatlo ka mga balay nga human sa light materials.
Masuwerte nga wala sang may napilasan sa insidente.
Sa karon, nagapabilin sa kustodiya sang mga kapulisan sa syudad ang nasambit nga mister kag magapangatuang sang nagakaigo nga panumbungon.
