ROXAS CITY – Sa pihak sang pagbayluhanay sang mga akusasyon kag pagpautwas sang kalain sang buot sa kada isa, nagpangibabaw ang pagpalangga sang mag-asawa nga Singh para sila ang magkasugot kag natigayon nga mag-ayuhay.
Ini matapos ginkompirmar ni Police Master Sergeant Rose Olaveja, ang pinuno sang Women and Children Protection’s Desk sang Roxas City Police Station nga nag-ayuhay na ang mag-asawa nga sanday Christian Michael Singh, 27 anyos, kag Mary Angel Singh, 24 anyos sang Barangay Banica, Roxas City.
Suno kay Olevaja, matapos gindangop sang Bombo Radyo sa ila talatapan ang problema, iya ini liwat nga gin-estorya kag ginpa-intiendi sang kabuhi sang isa ka mag-asawa.
Ginpahayag sini nga iya ginpanugyanan ang duha nga kalimtan na lamang ang mga nakaligad kag liwat nga mag-umpisa bilang mag-asawa.
Ginpahangop sini nga kun balik-balikon pa sang mga ini ang ila mga nakaligad, indi gid sila magkasugot.
Suno kay Olaveja matapos nga ginpamatian ang magtimbang nga bahin kag nagpatawaray, nagkasugot ang mag-asawa nga Singh nga mag-upod gihapon sa isa ka balay kag kalimtan na lamang ang ila mga nangin away.
Ginpanugyanan man ni Olaveja ang duha nga pananglitan may mangin problema sila liwat nga mag-asawa, magdangop lamang sa iya talatapan para ila ini matawhay nga mahinalaan.
Matandaan nga una nga nagdangop sa pulisya kag sa Bombo Radyo ang nasambit nga mister agud i-reklamo ang misis sini nga nagsakit sa iya.
Gilayon man nga nagdepensa ang misis kag nagtuad sang mga rason kun ngaman nahimo sini nga sakiton ang iya nga mister.
