MAAYON, CAPIZ – Patay ang isa ka mister matapos nagbitay sa kusina sang ila balay sa Barangay Mainit, Cuartero, Capiz.
Ginkilala ang biktima nga si alyas Tata, 37 anyos sang nasambit man nga lugar.
Sa interview sang Bombo Radyo kay Police Executive Master Sergeant Richard Franco, tagpamaba sang Cuartero PNP, ginpahayag sini nga hubog nga nagpauli sa ila nga balay ang biktima kag nagapangita sang pagkaon sa iya nga misis.
Wala ini ginsapak sang asawa kag sa baylo ang iya nga pito ka tuig nga bata ang nagserbi sang pagkaon sa iya.
Ginkaakig ini sang biktima rason nga nahaboy niya sang plastic chair ang iya misis nga naigu sa mata.
Sang naumpawan sa kahulugbon nagpangayo ini sang pasaylo sa iya misis apang wala na siya ginasapak.
Pagkaaga, ginhambalan sang mister ang iya asawa nga magpakonsulta sa ospital apang wala gihapon ini nagasabat sa iya.
Sa tuman nga paghinulsol matapos nasakit ang iya nga misis, nagbitay ang biktima sa ila kusina gamit ang pisi.
Nakit-an pa sang misis ang iya asawa nga nagakupo sa ila anak antes ini nagsulod sa kwarto apang wala niya ginalauman nga magabitay ang iya asawa.
Mismo ang ila anak ang nagdalagan pakadto sa iya iloy agud magsugid na nagbitay ang iya amay.
Ginapahayag nga nagbilin pa sang ‘suicide note’ ang biktima kun sa diin nakasulat nga nagapangayo ini sang pasaylo sa iya nga asawa.
