ROXAS CITY – Nagapanawagan ang isa ka mister nga mapadasig na ang pagpapauli sa Sitio Jail, Barangay Lawaan, Roxas City sang iya napatay nga manghod sa Lambunao, Iloilo.
Suno kay Ramil Rendon, 43 anyos, nagpadulong ang iya napatay nga utod nga si Roland Rendon, 34 anyos sa Iloilo para mag-trabaho sa ginapaobra nga gate apang ini ang nakuryente-patay sadtong Mayo 6.
Aminado si Rendon nga blangko pa gid ini kun ano ang matuod nga natabo sa iya utod bangud indi man makapauli ang iya mga kaupdanan bangud yara pa sa idalom sang General Community Quarantine (GCQ) ang Capiz.
Sa iya inisyal nga nahibaluan, ginbuligan pa si Roland sang iya kaupod nga si Marlon Pacheco apang ginbawian gid ini sang kabuhi.
Sa karon suno kay Ramil wala sila sang iban nga luyag matabo kundi ang mapapauli na ang bangkay sang iya nga utod.
Kinahanglan suno diri nga makasiguro sila sang Certificate of Acceptance kalakip ang death certificate para makalusot sa Iloilo-Capiz border ang iya utod.
Ang amo nga dokumento suno diri ang dapat aprubado sang ila nga punong barangay, alkalde sang siyudad sang Roxas kag gobernador sang Capiz.
