ROXAS CITY – Nagpabalhag sang reklamo sa Roxas City Police Station ang isa ka mister matapos nga ginaalegar gintaban sang isa ka sales clerk sa isa ka daku nga mall ang kwarta sini sa San Roque Extension., Roxas City.
Sandig sa ginpabalhag nga reklamo ni Ernesto Garcia, 63 anyos sang Mansion Road Barangay XI sining siyudad ginsaligan niya nga ibilin ang kwarta nga P2,210 sa sales clerk nga si Jean Dumol sang Sitio Lawis, Barangay Baybay sining syudad agud ibayad kuntani sa water delivery.
Apang matapos ang duha ka oras, nagpanawag ang nasambit nga sales clerk sa asawa sang tagreklamo agud ipalab-ot nga kulang sang isa ka libo ang ginhatag sang tagreklamo sa amo nga sales clerk.
Nagdepensa naman ang tagreklamo nga insakto ang kuwarta nga ginhatag niya sa sales clerk kun sa diin ginapanindugan pa sini nga gin-isip niya sang makatatlo ka beses ang kwarta antes ginhatag kay Dumol.
Nahibaluan nga matapos ang insidente indi na nila ma-contact ang amo nga sales clerk.
Bangud diri, ginpakamaayo na lamang sang tagreklamo nga ipabalhag sa pulisya ang insidente.
