ROXAS CITY – Gindala sa Roxas Memorial Provincial Hospital ang isa ka amay matapos nagtuyo nga magpanginmatay pinaagi sa pagbitay sa sulod sang iya balay sa Barangay Tiza, Roxas City.
Ang wala na ginhingadlan nga biktima ang yara na karon sa estable nga kondisyon kag padayon nga ginabulong sa ospital.
Suno sa anak sang biktima, natingala ini bangud wala nagasabat ang iya amay sa iya pagpanawag sa guha sang ila balay.
Diri kag nagdesisyon siya nga tsekyaron ang amay sa sulod kag didto iya nakit-an nga may nakahigot na nga pisi sang liog sang biktima kag wala ini sang animo.
Gilayon man nagresponde ang mga katapo sang Capiz Emergency Response Team sa nasambit nga lugar kag gindala ang biktima sa ospital.
Suno naman sa isa pa ka anak sang biktima nga si Christopher, posible nga pagpangimon sa ila iloy ang rason sang iya amay sa pagtuyo nga pagpanginmatay.
Ginpahayag sini nga ginhusay na sa pulisya ang iya amay kag iloy kun sa diin nakasugtan nga magabulagay na lamang ang mga ini.
Suno pa diri nga ginasakit sang iya amay ang ila iloy kag ginaalegar ginapahog pa nga patyon.
Nahibaluan dugang nga ini na ang ikaapat nga beses nga nagtuyo nga magpanginmatay ang nasambit nga biktima.
