ROXAS CITY – Nakadalagan pa padulong sa katalunan ang mister nga ginbuno-patay sang iya ugangan sa Barangay Cabangahan banwa sang Panitan.
Sa interview sang Bombo Radyo kay Punong Barangay Dino Detablan, ginpahayag sini nga posible pa matabangan ang biktima kun nagdalagan ini sa madamo nga panimalay.
Apang, nakit-an na lamang ini sang mga barangay tanod sa may katalunan isa ka oras matapos ang insidente pinaagi sa pagsunod sa mga tinulo sang dugo sa lugar.
Ginapahayag nga wala na sang kabuhi sang nasapwan ang biktima kag posible na hubsan sang dugo.Matandaan nga ginkilala ang biktima kay Allen Ruel Abon, 32-anyos, tumandok sang Bicol Region apang nakapangasawa sa banwa sang Panitan.
Sa panaysayon ni Detablan, nakit-an sang suspek nga ginlampusan sang biktima ang iya bayaw nga bata sini nga si Junie Amaba sa ulo gamit ang tasa.
Dugang pa diri nga matapos ang pagpanglampos, gilayon nga gin-gabot sang biktima ang iya binangon kag ginhana nga lab-on ang iya bayaw, rason nga gin-agaw sini ang binangon kag ginbuno ang biktima sa dughan.
Posible suno diri, bilang isa ka amay gin-unahan na lang ni Amaba ang tuyo sang iya umagad nga sakiton pa ang iya bata.
Ginaalegar nga may yara sang deperensya sa paminsaron si Abon kun sa diin masami ini nga nagapanglampos sang mga kagamitan sa ila balay kag ginapahayag nga may yara sang may nagahutik sa iya nga himuon ang isa ka bagay rason nga nahadlok sini ang iya asawa.
Ginpahayag ni kapitan nga ba-se sa nangin resulta sang autopsy examination sa bangkay, madalom sini ang naangkon nga pilas kun sa diin malapit na nga mahukas sini ang iya korason.
Handa naman nga paga-atubangon ni Amaba ang mangin desisyon sang pamilya ni Abon kun ini ang pagapasakaan sang panumbungon.
