Mister nga nagatinlo sang iya armas, patay matapos aksidente nga maluthangan ang kaugalingon

ROXAS CITY – Patay ang isa ka mister matapos aksidente nga maluthangan ang iya kaugalingon samtang nagatinlo sang iya armas sa sulod sang iya kuwarto sa Barangay West Villaflores, Maayon, Capiz.

Ginkilala ang biktima nga si Harry Madahan, 56 anyos kag residente man sang nasambit nga lugar.

Base sa inisyal nga impormasyon nga nakuha sang Bombo Radyo Roxas, nagatinlo sang iya nga 12 gauge shotgun ang biktima sang aksidente ini nga naglupok kag naigu sa iya nga ulo.

Ginkakibot naman sang iya nga anak sang makabati ini sang lupok kag sang nagsulod sa kwarto, diri iya nakita ang nagahuray-ad nga biktima nga may igu na sa ulo kag wala na sang kabuhi.

Gindala pa sa ospital ang biktima apang gindeklarar nga dead on arrival.