DUMALAG, CAPIZ – Naga-init-init nga balatyagon kag nagabaga-baga nga pagkahidlaw ang rason kun ngaa nadesisyonan sang isa ka mister nga kawaton ang tion nga padulongan ang iya misis sa isa ka quarantine facility sa Barangay Consolacion, Dumalag, Capiz.
Sa interview sang Bombo Radyo Roxas sa Punong Barangay sang nasambit ngan lugar, isa ka Returning Overseas Filipino ang 29 anyos nga misis kag Agosto 24 ini nakapauli sa probinsya sang Capiz rason nga gilayon ini nga ginpaidalum sa quarantine sang Setyembre 4 bangud nakabatyag ini sang pila ka mga mild symptoms kasubong sang paglagnat.
Setyembre 5 sang nadesisyonan nga igapaupod nalang sa Quarantine Facility ang mag-asawa matapos natalupangdan sang mga otoridad nga makapila na ka beses nga nagapadulong ang nasambit nga mister kag para man sa pagpabilin sang seguridad bangud ginahulat man sang iya misis ang resulta sang RTPCR Test sini.
Apang sang Setyembre 10, ginkakibot sang mga nagabantay sa nasambit nga pasilidad nga kasubong magahod rason nga gintsekyar nila ang kwarto sang mag-asawa kag nakita nga ginaluok sang nasambit nga mister ang iya misis.
Madasig nga nagtaklas ang mister sa pader sang amo nga pasilidad agud magpalagyo padulong sa ila puluy-an rason nga gilayon man ini nga ginpadulungan sang mga opisyales sang barangay kag katapo sang kapulisan agud arestuhon.
Ginapatihan nga ginkaakig sang nasambit nga mister ang wala paghatag sang misis sang iya nga password sang tion nga ginhulam sang mister ang cellphone sang iya asawa.
Sa karon, temporaryo nga ginpatinir sa Consolacion Elementary School ang nasambit nga mister apang ginaproseso naman sa karon ang mga dokyumento nga pagagamiton para sa pagpasaka sang panumbungon matapos nagpalagyo sa quarantine facility.
Samtang yara naman sa Consolacion Day Care Centre ang nasambit nga misis malayo sa iya mister.
