ROXAS CITY-Patay ang 43-anyos nga mister matapos nga gintiro sang pulis sa Barangay Sagrada, Famillia, Dumarao Capiz.
Ginkilala ang biktima nga si Renato Pampag, residente sang nasambit nga lugar.
Sandig sa inisyal nga imbestigasyon sang Dumarao Municipal Police Station ginaalegar nga samtang nagalakat ang suspek nga ginkilala nga si Patrolman Mamerto Arellano 34-anyos, residente sang amo man nga lugar kaupod ang ugangan sini kag hinablos sang hinali nga gintambangan ini sila sang biktima.
Ginpahayag nga may yara sang natabo nga pagbinaisay sa tunga sang suspek kag biktima kun sa diin hinali nga ginlabo sang biktima ang nasambit nga pulis.
Nakatigayon nga nakalikaw ang nasambit nga pulis apang natumba ini sa dalan.
Samtang natumba sa dalan si Arellano, gintuyo ini nga lab-on ni Pampag apang naunahan na ini gintiro sang nasambit nga pulis.
Nakaangkon sang madamo nga pilas sa kalawasan ang biktima nga gintunaan sang iya nga kamatayon.
Narekober sa crime scene ang isa unit sang kalibre .9mm nga armas-luthang kag isa ka deformed slug.
Away sa duta ang ginalantaw nga motibo sang mga kapulisan natuhoy sa nasambit nga krimen.
Sa karun nagapabilin nga at-large ang nasambit nga pulis matapos nga madasig nga nagpalagyo matapos ang insidente.
Mahibaluan nga si Arellano ang aktibo nga miyembro sang Negros Provincial Mobile Force Company sang Philippine National Police sa Negros Occidental.
