ROXAS CITY – Nag-angkon sang mga pilas sa lawas ang isa ka mister matapos nga ginaalegar ginlabo sang binangon sa Barangay Poblacion Norte, Ivisan, Capiz.
Ginkilala ang biktima kay Rommel Esmarialino, 44 anyos sang nasambit nga lugar.
Suno kay Police Staff Sergeant Emilio Ubalubao III, imbestigador sang Ivisan PNP nga nagbinaisay ang biktima kag ang suspek nga si Bobby Jorda, 29 anyos sang amo man nga lugar matapos nga ginaalegar nagpamila ang biktima kag nahibaluan nga yara sa idalom sang impluwensiya sang makahulubog nga ilimnon.
Ginpahayag ni Ubalubao, nga ginhangkat pa sang biktima ang suspek nga mag-inaway rason nga nagpauli ini kag nagkuha sang improvised wooden bat nga nagahaba sang 80 sentimentro.
Samtang, lipod sa ihibalo sang biktima nga nagpauli man ang suspek kag nagkuha sang binangon.
Bangud diri, nag-atubangay na ang duha rason nga nalab-an ang biktima kag nag-angkon sang pilas sa ulo kag nawong.
Gilayon naman nga gindala sa Roxas Memorial Provincial Hospital ang biktima samtang ang suspek naman nagapabilin karon sa kustodiya sang Ivisan Municipal Police Station matapos nga nagtuyo pa kuntani nga magpalagyo matapos ang insidente.
