ROXAS CITY-Pilason ang 59-anyos nga mister matapos nga ginbungguan sang motorsiklo samtang nagatabuk sa dalan sa Barangay Bolo, Roxas City.
Ginkilala ang biktima nga si Edwin Besa, residente sang Sitio Pinaypayan Barangay Bolo sining siyudad.
Sandig sa pagpangusisa sang Bombo Radyo nga samtang nagatabuk sa dalan ang biktima, aksidente ini nga nabungguan sang motorsiklo sakay ang wala matumod nga driver.
Bangud sini, natumba sa dalan ang biktima kag nakaangkon sang mga kasamaran sa magkatuhay nga porsyon sang kalawasan.
Samtang ang driver sang motorsiklo ang madasig nga naglakat sakay sa iya nga motorsiklo nga nagpadulong sa wala matumod nga direksyon.
Suno sa nakakita sa insidente nga si Renan Abisor nga ginatinguhaan pa sini nga lagson ang driver apang wala niya ini maabtan bangud pag-abot sa Barangay Lanot, sining siyudad, hinali na lamang ini nga nangin dulaan.
Ginpahayag nga Suzuki Smash nga nagaduag green ang nakabunggo sa biktima.
Samtang ginaalegar sang mga nakikita nga yara sa idalom sang impluwensiya sang makahulubog nga ilimon ang biktima.
Narekober sa dalan ang isa ka helmet nga nagaduag itom nga ginapatihan ginapanag-iyahan sang driver sang motorsiklo.
Sa karon nagapadayon pa ang imbestigasyon sang mga kapulisan agud matumod ang nasambit nga driver.
