Mister pilason matapos nga nakabunggo ang ginamaneho nga motorsiklo sang layaw nga ido

ROXAS CITY – Pilason nga gindala sa ospital ang isa ka mister matapos nga aksidente nga nakabunggo ang ginamaneho nga motorsiklo sa isa ka layaw nga ido sa Barangay Sta. Rita, Dumalag, Capiz.

Ginkilala ang pilason nga si Roel Fadrogane, 45 anyos sang Barangay Consolacion sang amo man nga banwa.

Base sa inisyal nga imbestigasyon sang Dumalag Municipal Police Station, samtang ginasubay sang biktima ang dalanon sakay sa ginamaneho sini nga motorsiklo sang hinali na lamang nga nagtabuk ang isa ka layaw nga ido rason nga nadulaan ini sang kontrol sa pagmaneho.

Bangud diri, madasig nga gindala sa Dao District Hospital ang nasambit nga biktima agud dapatan sang nagakaigo nga pagbulong.