ROXAS CITY – Nagdangop sa Bombo Radyo ang isa ka senior citizen nga miyembro sang Ati community sa Barangay Tina, Dumarao, Capiz agud klaruhon ang nagalapta nga mga istorya sa ila barangay nga kasubong ginapakalain sini ang ila nga punong barangay.
Suno kay Estelita Ilosindo, indi sang matuod ang ginaalegar ginapalapta nga estorya sa ila lugar ni Lilian Benecio nga ginkadtuan siya ni Punong Barangay Rene Ternura kag ginbawian sang ayuda nga iya nabaton sa idalom sang Social Amelioration Program (SAP) sang Department of Social Welfare and Development (DSWD).
Ginsaysay ni Ilosindo ang matuod nga natabo kun sa diin suno diri, ginpadulungan siya ni Ternura kag ginhambalan nga nagguwa sa ila balidasyon sa mga benepisyaryo sang Pantawid Pamilyang Pilipino Program (4P’s) nga nakabaton ini sang ayuda sa idalom sang (SAP) sang siya ang nagtenir sa Barangay Yawyawan, Lemery, Iloilo.
Suno diri nga ginpaathagan siya sang kapitan nga mas maayo kun ibalik sini ang nabaton nga P6, 000 sa Iloilo para ma-qualify sa gihapon ini nga makabaton sang ayuda sa idalom sang 4P’s.
Ginpahangop suno diri sang kapitan nga mas maayo kun pilion niya ang ayuda sang 4P’s bangud tayuyon ang iya nga pagbaton sini butang nga ginsunod man ni Ilosindo kag ginbalik ang iya una nga nabaton nga P6, 000.
Apang nagalain ang buot ni Ilosindo sang nakalab-ot sa iya nga nagpalapta siya sang istorya nga pwersahan siya nga ginbawian sang ayuda sang ila kapitan.
Ginatudlo sini nga responsable sa pagpakalain sa iya amo si Benecio nga live-in partner sang isa ka barangay kagawad nga wala ma-qualify nga makabaton sang ayuda sa idalom sang SAP.
Sa karon suno kay Ilosindo, gusto niya lamang tinluan ang iya pangalan bangud nagadayaw siya sa ila mga opisyales sa pagbulig sa ila kag wala gid siya sang malain nga mahambal batuk sa mga ini.
Suportado naman ni Emily Parcon, parent-leader sang 4P’s ang mga pahayag ni Ilosindo.
Suno diri nga wala nagatugda sa implementasyon sang 4P’s ang mga opisyales nila sa barangay bangud sila ang gintugyanan sini kag nagagiya lamang sa ila ang mga barangay officials.
