ROXAS CITY – Pagsalig sa kaugalingon, sa diyos kag pagtutok sa handum sa kabuhi ang nangin giya agud makagradwar sa iya nga pag-eskwela.
Ini ang ginpahayag ni Rosie B. Galagate, isa ka miyembro sang Panay-Bukidnon sa barangay Roxas, Tapaz, Capiz nga naggradwar bilang isa ka Magna Cum Laude sa kurso nga BS Secondary Education Major in Filipino sa Capiz State University – Main Campus, sang ma-interview sang Bombo Radyo.
Suno diri, wala niya gina-ekspektar nga magatapos siya bilang isa ka magna cum laude, apang naga-ekspektar ini nga may yara lamang sang latin award.
Indi man nangin mahupos para sa iya nga malab-ot ang nasambit nga pasidungog bangud nagakinahanglan ini sang pagbakas sa pag-eskwela ilabi na nga siya isa ka IP’s scholarship.
Dugang pa sini, sa tion nga ginasugid sini sa ila nga eskwelahan nga siya isa ka miyembro sang indigenous people, kadam-an sa ila ang indi magpati.
Dako man ang iya nga pagpasalamat sa iya pamilya kag sa mga tagdumala sang nasambit nga scholar sa paghatag sa iya sang wala tupong nga suporta.
Handa man siya suno diri, nga magbalik sa ila nga komunidad agud magbulig kag magtudlo sa mga kabataan nga nagakinahanglan sang bulig sa pag-abot sa pag-eskwela.
Mensahe sini sa tanan nga dulaon ang imahe sang diskriminasyon sa ila, bangud kapareho sang kadam-an nagabakas man ang mga ini kag parte man sang aton kumonidad.
