ROXAS CITY – Hugot nga ginpanginwala sang isa ka miyembro sang LGBTQIA+ nga gindakop sa buybust operation sang Hulyo 24, nga nagagamit kag nagaduso siya sang iligal nga droga.
Sa interview sang Bombo Radyo kay Cristy Joy Compuesto Evangelio, 23- anyos kag residente sang Brgy. Amaga, Sigma, matigdas sini nga ginsiling nga wala siya nahadlok kag ginakulbaan bangud nahibaluan niya sa iya kaugalingon nga wala siya may ginhimo nga malain.
Matandaan nagahilibion si Evangelio kahapon nga adlaw samtang ginadakop sang kapulisan kag liwat- liwat ginsiling nga indi iya ang nakuha nga droga sa iya posesyon kag ginbutang lang ini sa iya bulsa.
Dugang sini, gikan siya sa isa ka remittance center sa ila banwa sakay sang iya man motorsiklo kun sa diin nagkuha siya sang ginpadala nga kuwarta sang iya tiya para sa iya lola, apang sang yara na ini sa bahin sang sementeryo sa barangay Amaga, ginparahan siya sang duwa ka tawo kag ginpahayag nga naaberya ang ila motorsiklo.
Gilayon naman siya suno diri nagpadulong sa talyer nga iya ginatrabahuan agud magpangayo sang bulig apang ginkakibot nalang sini sa iya pagbalik sang gin-agbayan siya kag ginsakwat pababaw kag didto ginkasahan sang buybust.
Sa pihak nga bahin, ba-se naman sa iya mga katrabaho sa talyer, ginkakibot man nila ang natabo kay Evangelio bangud sa ila pagkakilala diri, indi sini mahimo nga maggamit ukon magduso sang droga kag masami sa talyer lang ini nagatenir kaupod ang iya menor de edad nga manghod.
Mahibaluan nga natigayon na nga mapa- drugtest si Evangelio kag ginahulat na lang ang resulta sini, natalana siya subong nga adlaw nga mapasakaan sang kaso samtang nakahunong sa karsel sang Sigma MPS.
