Nag-surrender ang isa ka miyembro sang rebelde nga grupo- komiteng rehiyon panay sa katapo sang Philippine Army kadungan sang ginpatigayon nga operasyon sang 301st Infantry “Bayanihan” Brigade sa Central Panay.
Ginkilala ang miyembro sang grupo nga si Johnny Emolaga, alias “Mego”, 31, tumandok sang Barangay Alameda, Igbaras, Iloilo kag nagsungka bangud sa na-angkon nga pilas sa engkwentro sa Tapaz,Capiz sang tinalikdan nga Setyembre 20.
Sa interview sang Bombo Radyo kay 1LT John Bethoven Malana, Civil Military Officer sang 82nd Infantry Battalion,iya ginpahayag nga gilayon nga gindala sa ospital si alyas Mego kag padayon nga ginabulong sa ospital.
Suno kay Malana, masobra 100 na nga katapo sang NPA ang nagbalik sa sabak sang gobyerno kag ginabuligan pinaagi sa Enhance Comprehensive Local Integration Program (ECLIP).
Pahayag pa niya, may yara sang amnesty program ang gobyerno agud mabuligan ang mga miyembro sang nasambit nga grupo nga nagakabalaka sa ila seguridad sa tion nga madesisyonan nga magbalik sa sabak sang gobyerno.
Ginapangabay man sang natungdan ang nabilin nga miyembro sang rebelde nga grupo nga magsungka na para sa kahilwayan kag kalinong sang tanan.
