Nagapreparar na ang Metropolitan Manila Development Authority (MMDA) para sa pagahiwaton nga Metro Manila Film Festival Parade of Stars sa palaabuton nga Sabado, Disyembre 21.
Ang parada amu ang ginalauman nga mangin opening act para sa 50th edition sang MMFF nga pagatambungan sang mga kilala nga personalidad nga amu ang highlight sa mga pelikula nga igapaguwa sa mismo nga adlaw sang paskwa.
Makit-an man sa parada ang mga magarbo nga floats gikan sa pulo ka opisyal nga entries sa nasambit nga film fest.
Suno kay MMDA kag MMFF Concurrent Chairman Atty. Don Artes, ginalauman sang ila pamunuan nga magadugok ang mga tawo sa mangin ruta sang parada para makit-an ang ila tagsa ka mga ginaidolo.
Nagpahamtang man gilayon ang ila ahensya sang deployment plans kun sa diin masobra 3,000 nga mga MMDA personnels ang ila nga igapalapta sa mga pagaagyan nga ruta sang parada para sa crowd control kag pagsiguro man nga magin maayo ang ilig sang trapiko sa amu nga adlaw.
Samtang, magasugod naman ang parada pasado alas 3:00 sang hapon halin sa Kartilya ng Katipunan tubtob Magallanes Drive sa may Manila Central Post Office.
Pagkatapos, makaangkon man sang tsansa ang publiko nga maka-meet and greet sa ila nga mga idolo kag pagasundan sang isa ka music festival.
Bilang kabahin naman sang ila management plan, magapatuman sang temporary lane closures kag stop-and-go scheme sumugod alas 12:00 sang udto tubtob alas 8:00 sang gab-i.
Pila sa mga alagyan nga ipasarado amu ang Padre Burgos, Quintin Paredes, Reina Regente, Abad Santos Ave., Tayuman St., Lacson Ave., Espana Blvd., Nicanor Reyes St., kag iban pa nga nagapanguna nga dalan sa Maynila.
