ROXAS CITY – Gin-athag sang chairman sang Committee on Finance and Appropriation sang Sangguniang Panlalawigan nga wala ginpaawat-awatan sang SP ang gina-request nga Memorandum of Agreement sang Philippine Medical Society kag gobyerno-probinsiyal natuhoy sa pagsaylo sang mga non-COVID-19 patients sa Roxas Memorial Provincial Hospital sa mga pribado nga ospital.
Kasunod ini sang ginapautwas nga mga hibubun-ot sang pila ka mga doktor sa ginpatigayon nga special session sang SP.
Suno kay Board Member Jonathan Sonny Besa nga wala malakip sa gintalakay sang nagligad nga sesyon ang nasambit nga MOA bangud atrasado na ini nga ginsumiter sa ila.
Gindugang pa ni Besa nga may ginhinyo ang executive department nga talakayon ang pagpapasar sang supplemental budget nga gamiton para sa kampanya kontra COVID-19 apang wala sila sang may nabaton nga request para sa nasambit nga MOA.
Ginpanindugan sini nga maid-id nga gintalakay sang konseho ang nasambit nga MOA sang ginpalab-ot ini sa ila rason nga naatrasar ang pagpapasar sini.
Samtang ginkumpirmar ni Besa nga natalakay na kag ginpapasar na ang resolusyon para sa amo nga MOA sang nakaligad nila nga special session.
Suno diri ginrekomendar sang konseho nga magapain sang pondo para gamiton nga bulig-pinansyal agud igabayad sang mga non-COVID-19 patients nga sayluhon sa mga pribado nga ospital.
Apang suno kay Besa nga wala ini sang ideya kun pila ang igapain nga pondo sang gobyerno probinsyal para diri.
