ROXAS CITY-Ginkompirmar ni City Councilor Paul Ivan Baticados nga gin-aprubahan na sa sesyon sang Sangguniang Panlungsod ang Memorandum of Agreement sa tunga sa City Government kag sang Panay Medical Ventures Inc. sa regular session.
Sa interview sang Bombo Radyo kay Baticados ginpahayag sini nga ang tinutuyo sang siyudad nga mapadasig ang pagpaguwa nga mga test results sang mga gin quarantine nga mga Returning Overseas Filipinos.
Suno diri nga pagadal-on sa nasambit nga pasilidad ang mga specimen swab sample sang mga repatriates kag mahimo na nga mahibaluan ang resulta.
Gindugang pa ni Baticados nga dako ini nga bulig sa siyudad agud malikawan nga mapuno ang mga quarantine facilities bangud nagapadayon ang pag-alabutan sang mga nagapalauli sa siyudad.
Ginhimo ini nga tikang sang siyudad kasunod sang pagka-atrasar sang mga test results sa Western Visayas Medical Center sa siyudad sang Iloilo.
Magluwas diri, madamo man sang mga gina-quarantine nga mga repatriates nga nagareklamo nga madugay nga nagatenir sa mga quarantine facilities apang wala pa kaabot ang ila mga resulta.
